মৃত শৰীৰে কেতিয়াও কথা নকয়
কেতিয়াও গান নাগায়
কেতিয়াও নকয় ভালপাওঁ বুলি
মৃত শৰীৰে গোন্ধ নাপায় ৰজনীগন্ধাৰ
সহস্ৰ ধূপ-ধুনাৰ
সুবাস নলয় মিঠাতেলৰ চাকিৰ
মৃত শৰীৰে কান্দোন নুশুনে
উচুপি কান্দি সংগ দিব নোৱাৰে
নোৱাৰে নিচুকাব শিতানত বহি মূৰত
হাত বুলাই
মৃত শৰীৰে শ্ৰাদ্ধৰ প্ৰসাদ নাখায়
নলয় দহ মোন গাখীৰৰ হিচাপ
লয় জানো ভোজৰ মাছৰ জুতি 
মৃত শৰীৰে দান-দক্ষিণা কৰে জানো গ্ৰহণ
যায় জানো সোঁৱৰণী সভালৈ
পঢ়ে জানো সোঁৱৰণী গ্ৰন্থ
মৃত শৰীৰে মাৰ্বল লগোৱা সমাধিত টোপনি নাযায়
শোকৰ শোভাযাত্ৰাত বগা অথবা 
ক’লা কাপোৰ পৰিধান নকৰে
মৃত শৰীৰে সত্য নিচিনে
অসত্য কি তাকো নাজানে
উৰ্দ্ধ বাহুৰ আলিংগনত উষ্ণতা নাপায়
জীয়া শৰীৰৰ প্ৰাণেহে তোমাক মাতে!