অ’ আমাৰ মনৰ ঈশ্বৰ
তুমি দিলা আমাক এখন আকাশ,
আকাশ ব্ৰহ্ম!
সেই আকাশ চুবলৈ ভিন্ন হাতেৰে
হাবিয়াসৰ অন্ত নাই
পৃথিৱীৰ অগনিত দেশভিন্ন মানুহৰ
দেশবোৰে নিগনিৰ দৌৰ দিয়ে
ৰাষ্ট্ৰবোৰে নিগনিৰ দৌৰ দিয়ে
সেই ভিন্ন আকাশ চুবলৈ।
নিৰলে নিজানে সেই একেই আকাশ
সেই একেই আকাশৰ ছায়াত
সমন্বয়ৰ
এটা কবিতাৰ বাবে
এটা গানৰ বাবে
এটা দীঘল গল্পৰ বাবে
ৰৈ থাকে তথাপি এজাক সপোন খেদা
মানুহ!
তেওঁ হ’ব পাৰে
ভিন্ন দেশ
ভিন্ন সংস্কৃতি
ভিন্ন ভাষাৰ
পূৰ্ণ কৰিবলৈ এটা
সপোনৰ ঘৰ,
এখন আকাশৰ তলত
য’ত লীণ হৈ যাব
ক’লা মানুহ
বগা মানুহ।
য’ত লোপ হ’ব
তোমাৰ দেশ
মোৰ দেশ
তোমাৰ ধৰ্ম
মোৰ ধৰ্ম
বিদিৰ্ণ হৈ পৰিব বৰ্ণ বৈষম্য
ধৰ্মীয় বিভাজন।
আমাৰ কাম্য
এখনেই আকাশ
এক আকাশ
এক গাওঁ!
হ’ম আমি
বাসিন্দা এখন গাঁৱৰ।
শান্তিৰ গাওঁ
সম্প্ৰীতিৰ গাওঁ
স্বাধীনতাৰ গাওঁ।।